Dem boys seh...Nokta is a fake Amerindian

Dem boys seh…Nokta is a fake Amerindian

Apr 16, 2014 Dem Boys Seh, Features / Columnists, News

Guyana full of fake. It got fake drugs wha somebody does sell to de Ministry of Health. Dem boys only blowing whistle; you call de name. If you can’t call de name ask Jagdeo, de former President. He know de man good.
He know what is fake. Everything surrounding he is fake or scampish.
Nokta use to deh round he and become a fake. He deh in de midst of de protest in front Parliament. De story and headline seh that Amerindians protesting some cut.
When dem boys watch de photo dem see Nokta wid a Pee Pee Pee umbrella.
Dem boys hear that Sharma pull up wid he camera. He interview some of de people. He ask one woman wha she protesting for. She tell he that if she don’t do this she gun lose money.
Sharma tun and ask de woman if she gun lose cash too. Then he see Nokta. He know everybody protesting that day suppose to be Amerindian. Suh he ask Nokta if he is a Buck Man too. Nokta seh ‘Nah, me is a Bukta.” And a fake one too.
Another one ah Jagdeo friend get involve in a fake transaction wid Brazzy, de fat crook. Jail deh over this one head in de States.
Jagdeo and Brazzy give he de people land fuh next to nutten to set up a factory to employ people. That is Jagdeo and Brazzy theme song from Day One.
This was de same Brazzy, who when Donald tell him to release de Privatisation deals, he release a document wha only he, he wife, Bobby, Jagdeo and de devil understand. It was deliberate to confuse de media.
Dem boys want to believe that not even de Creatah would understand de document.
Dem boys did know that all de time dem was confusing de nation wid every state asset and project that dem tek or give way to dem friends.
When dem get ketch den dem jump and holler how much jobs Guyanese gun get.
Sanata Complex was to employ 1200 people. Only crappo, dog and snake deh in deh.
Dem boys seh is de same thing happen at Leonora. When people talk de first time how Jagdeo give he friend de land fuh next to nutten, he Brazzy jump up and seh that de man gun create job wid he wood process factory.
Today de man ah sell house lots fuh millions of dollars and de people who suppose to be getting jobs still waiting fuh he Brazzy and Ed fake wood factory.
Talk half and wait fuh de next Brazzy and Jagdeo fake announcement.