Dem boys seh...De Waterfalls paper mek Jagdeo talk

Dem boys seh…De Waterfalls paper mek Jagdeo talk

Apr 15, 2014 Dem Boys Seh, Features / Columnists, News

This weekend that pass was cuss out time and de Waterfalls paper get de most cuss out. Dem boys didn‘t know till Clement open he mouth and talk bout de special meeting and how it discuss de Waterfalls paper.
De meeting had nuff talk. Clement talk; Donald talk and Jagdeo talk. Dem boys did expect Jagdeo to talk because de paper does focus pun he once it dealing wid corruption. It does talk bout how he create condition fuh he friends and family and dem family.
Of course de paper notice how he save he money and get very rich and all because he use to live wid he mother when he start to wuk.
If dem boys coulda tun a fly pun de wall fuh hear wha he had to tell de meeting dem woulda pay all de money dem got in dem name. And dem boys woulda like to hear wha de friends had to tell de meeting bout corruption. All of dem woulda talk how dem save money but none of dem would talk how dem rob de treasury.
Dem had some people in de meeting who stand up and talk how de Waterfalls paper does talk de truth because dem have a lot of corruption in de country. De first man who seh suh get send to collect food fuh feed everybody else who been at de meeting. That was one way of shutting him up.
Somebody write a note to Donald asking he to make a statement bout de rampant corruption but Donald tell dem that he got to prepare a speech.
Ralph had he spy inside de meeting and he done hear that dem spending money to start a campaign against dem newspaper that does criticize de party. Jagdeo did actually pull de ads but that didn’t stop de criticisms.
He move a motion fuh de meeting call pun de party people to stop buying de paper but it didn’t get far. It was too sudden and loose. Toilet paper couldn’t help.
Talk half and don’t cuss de Waterfalls paper.