Dem boys seh...Kit got to get dribbling bib

Dem boys seh…Kit got to get dribbling bib

Apr 12, 2014 Dem Boys Seh, Features / Columnists, News

Kit mekking a comeback because de Jagdeo crew don’t have a proper mouth piece. Was a time when nuff people use to want to talk fuh Jagdeo. In fact, since a man open he mouth he use to hear that is Jagdeo want this and was Jagdeo want that.
If a man was to get a promotion and dem by-pass he de boss use to seh that is Jagdeo do that. Sometimes was true but then again, everybody want talk like Jagdeo and fuh Jagdeo.
Now that Jagdeo ain’t even talking fuh heself dem tunning to Kit. Brazzy was de first in de crowd to bring out Kit. He mek Kit sin he soul about de Marriott. Of course dem boys talk and Kit get vex and write letters to de press.
De other day Kit and Gerry team up fuh talk bout de money wha cut fuh de hinterland airstrip. Hap New did tell dem that it ain’t want cut de airstrip project but that Ash Knee try fuh link it to certain projects that nobody want to cut.
Dem boys seh that Hap New use de argument bout birds of a feather. It seh that Ash Knee deliberately put de airstrip in a position fuh get cut. Then he bring Kit fuh complain.
Well as a spokesman Kit also tun a write man. He write de editorial fuh de Big Market paper. He write how dem sick people who live in de hinterland got to walk to town fuh see doctor. And he get pay fuh saying suh.
Then he organize wid Gerry fuh hold a press conference but Gerry seh that Jagdeo ain’t deh round these days suh he got fuh hustle pun he own and he refuse to pick up people fire rage. He ask Kit if he ain’t see that everybody got dem own hustle.
That was when Kit talk till he dribble. Dem boys seh that as a spokesman he got to get a dribbling bib.
In fact, Brazzy want to talk bout de Marriott but Kit busy wid some other people. That is why nobody ain’t hear bout de Marriott. And since nobody can’t hear, dem boys sure that de hotel gun finish and people would never know who de foreign investor is.
De truth is that dem never had foreign investors; that was dem local boys who hustle de treasury putting in some of de money.
Talk half and keep far from Kit.