Dem boys seh...Jagdeo ketchin’ fits over de Waterfalls paper

Dem boys seh…Jagdeo ketchin’ fits over de Waterfalls paper

Apr 11, 2014 Dem Boys Seh, Features / Columnists, News

De way some people does behave you got to worry whether de country got any ruler. Is like everybody is a powerhouse. Dem people from Bai Shan Lin come. De Williams boy decide to tek dem to dinner, suh dem go to a Chinee restaurant name Hilton.
Don’t talk bout de food and don’t talk about how people does boast once dem belly full. De Bai Shan Lin people did cut nuff deal wid people in Guyana. Dem had deal wid Rob de Earth; dem had deal wid some other people in de government and is only when Donald start fuh check that people run and lef dem deal.
Anyhow, dem boys see when de Bai Shan Lin people walk into de Hilton restaurant wid de Williams Boy. From de time dem sit down dem start to talk bout who got de government in dem pocket. De Bai Shan Lin man actually tell de Williams boy that he got things under control. De man seh that he got people lock down from de top to de bottom.
Well dem boys jump because no foreigner ever come in Guyana and boast when Jagdeo was in control. He had people from top to bottom putting things in he pocket. Dem boys seh that he is de man who now stop people from writing de Pee Pee Pee column.
A long time back de Pee Pee Pee use to have a column in de Waterfalls paper. Dem stop after a while but dem boys didn’t know that was Jagdeo did stop dem. When some people in de party see that every other party had a column in de Waterfalls paper dem feel that de paper was discriminating against de Pee Pee Pee.
Dem come back de other day because de party get a break. But when Jagdeo find out, he stop dem again. Dem did only send in two columns. Jagdeo tell de Central Committee meeting that any column from de party must cuss de Waterfalls paper and de Waterfalls Boss man.
Well is only a fool gun give a man cutlass fuh chop off he, de fool, neck. De people tell Jagdeo that de Waterfalls boss man wouldn’t publish some column cussing he, but Jagdeo seh that only column like dat could go.
Donald was absent from that meeting. Dem boys waiting fuh hear wha he gun seh when he hear.
Talk half and don’t let Jagdeo kill de Pee Pee Pee.