Dem boys seh...Bobby shaping up to get more money from drugs

Dem boys seh…Bobby shaping up to get more money from drugs

Apr 07, 2014 Dem Boys Seh, Features / Columnists, News

Nuff people got something to hide. Some got to hide family secrets, some got to hide dem own things. Of course, dem got people who does try fuh hide demself. Bobby always trying to hide and is only few times dem boys does ketch he. At one stage people think that he was a vampire who does hide from light.
This is a man who sue de Waterfalls paper in New York. De other day dem boys see some of de things he lawyer tell de court. When de lawyer fuh de Waterfalls paper ask certain question, Bobby lawyer tell de court how he refuse to answer dem because he frighten de Waterfalls boss man. De truth is that he want hide de facts.
Dem boys was in de court when he ask fuh secrecy. He claim how de court should keep everything secret because de Waterfalls paper who ain’t got nutten to hide does write wha happen . De court ain’t even blink at he because nutten in de court is a secret especially when people claim that somebody tell lie pun dem.
This is de same people who think people like dem. Dem lawyer actually accuse de lawyer fuh de Waterfalls paper of hiding Uncle Adam. Dem boys seh that Uncle Adam ain’t got to hide from no lawyer.
Bobby claiming how de Waterfalls paper affect he business. Well dem boys wish somebody could affect dem business and dem can still get $7 billion a year and nobody to challenge dem.
That is why people watching de budget. Of course is more of de same thing. De government put money fuh more drugs and dem ain’t invite nobody else but Bobby. People talking but Bobby friends like Ash Knee ain’t listening.
Dem boys did expect Donald fuh tek a stand but he ain’t saying nutten because he worried about wha gun happen if he touch Jagdeo friend. But talk fuh rain and talk fuh sun, he got to touch Bobby otherwise people gun always believe that he is a puppet fuh Jagdeo.
Talk half and watch de drug situation.