Dem boys seh... Dem kantractas extras dry up since Jagdeo gone

Dem boys seh… Dem kantractas extras dry up since Jagdeo gone

Apr 02, 2014 Dem Boys Seh, Features / Columnists, News

A strange thing happening in de parliament. When de session start some people don’t even deh in dem seat, but by de time de Speaker announce that he adjourning fuh a short while all dem seat does full. That is de time when de snacks does share.
Dem boys can understand if people does do this one and far, but this thing happening all de time. Is like if dem same Member of Parliament can’t afford to live pun wha de same Finance Minister claim is a living wage.
Even Ash Knee don’t miss de free food. Dem boys want know if he and all feeling de pinch. But then again is de taxpayers paying, and de people in parliament don’t like nutten better than have de poor people pay fuh dem entertainment.
Dem boys notice that one man ain’t go by de parliament this year. Brazzy know that he ain’t got no money to get in de budget. Nobody ain’t vote money fuh de Marriott; dem ain’t voting money fuh de Amaila road and fuh sure dem ain’t voting no money fuh he friends who planning fuh mek money.
Ralph is de man who really talk ‘bout how this thing happen. He tell de world how Jagdeo collect couple businessmen and give dem government contract knowing that dem can’t do de wuk but that dem gun go way wid de money. De Auditor General run into this problem. He find out some of dem kantracta get more money than dem should. And when he try fuh collect he hear that some of dem dead. De others don’t even try fuh pay back and nobody don’t fight dem down. Is things like that mek de opposition always cutting de budget. Ash Knee does always put in more money than a project need. Ralph expose how nuff ah dem get rich using de people money.
Ralph also talk how some of dem same businessman now looking to a new feeding trough. Dem looking to de opposition, because dem know that Jagdeo ain’t got no more say; that he can’t give dem nutten no more.
And that is why dem boys seh that Donald sit down too long while de corruption been going on. He get some of that paint pun he skin.
Talk half and help Donald wid he crosses.