Dem boys seh...Bobby and Jagdeo frighten

Dem boys seh…Bobby and Jagdeo frighten

Mar 30, 2014 Dem Boys Seh, Features / Columnists, News

Guyana beginning to look and sound crooked. Dem boys flying in a plane and dem see how shape change. One man seh that it tek de face of Jagdeo, another seh that de centre look like Brazzy belly and dem boys seh that de tail part look shaat like Bobby.
That happen because of de airwaves and since all de crooks flying in de air. Jagdeo give away half of Guyana after he done tek half fuh heself and he friends and family.
One quarter he give to de Chinese and de other quarter he give to de Brazilians. De real Guyanese, coolie and black man, ain’t lef wid one S*&$##. De last thing he give way was de airwaves. He try fuh give way de sky but he find out that de sky belong to de Creatah.
He do all that to Guyana and he got de nerve fuh try to guh back in de chair. Dem boys got a message fuh he. Dem wouldn’t rest until he and Brazzy and all of dem see de jail door. He never allow de DEA and de FBI because he know that he and all ee friends woulda done deh in jail because of wha dem people woulda done pick up. He only delay destiny.
Donald allow dem fuh come in but dem nah set up office yet. Dem deh all over de place. Some of dem wukking wid Bobby and he nah know. That is why de other day when he loss he office key he didn’t realize that de Feds did want to search he office.
Dem boys would like to know wha dem find and how much dem see wha Jagdeo really own in Bobby business. Bobby change de lock in he office but by then de Feds did done get wha dem want.
Now Bobby distressed and Jagdeo worried over that. But Donald seh that if you nah do nutten you nah got fuh frighten anything. But Bobby and Jagdeo frighten.
Talk half and look out fuh de arrest.