Dem boys seh...Budget mean Bud-dy get, says Ash Knee

Dem boys seh…Budget mean Bud-dy get, says Ash Knee

Mar 25, 2014 Dem Boys Seh, Features / Columnists, News

Monday was Budget Day. This year de whole nation get to realize that in Guyana, Budget mean Bud-dy get. Ash Knee announce that dem old people get US$3 raise per month pun dem pension.
That money gun buy one cheap lunch fuh one day in de month. That could barely buy a plate of veggie cook-up. But in de same budget he buddy dem really get. He tell Brazzy that dem guh build another hotel. That would be de two of dem pension.
Dem boys want tell he that by announcing that he trying to shift attention away from de Marriott. Dem boys ain’t falling fuh that.
Brazzy still got to announce de secret investor in de first one. Dem boys seh that dem gun only put Buddy as a front as de investor in de casino, restaurant and night club.
Dem boys done hear that it done finalise.
Last year, just like this year dem throw pennies at de masses and billions at dem friends and family. Every time when dem seh that is de largest budget ever is because dem got to add on more of dem man joining de party.
Last year dem tek plenty of de budget money and put ads in de Hard Times paper. This is Jagdeo paper. Dem done start doing that this year already.
Irfaat Ministry is de one that tekking part of de budget and throwing it in de Hard Times paper. Dem throwing nuff money in de Learning Channel but most people can’t see it. Whether it show or not dem got to pay Bobby.
Is de same thing dem had to do when Bobby claim how dem owe fuh he warehouse space. This was de same man who claim that he never charge fuh warehouse space.
De big joke was that when Ash Knee done present de budget dem poor people still waiting to see wha dem got to get. Last year he announce a five per cent increase. Luncheon mek it clear that NIS ain’t paying no five per cent. It had to mek back de money it spend behind Clico suh de poor people got to suffer.
Dem boys seh that it is like de poor people pay Jagdeo, Luncheon and Brazzy and de government to gamble wid dem money.
Talk half and pray that Donald ain’t got to depend pun de budget fuh live.