Dem boys seh...Donald pull Jagdeo plug

Dem boys seh…Donald pull Jagdeo plug

Mar 22, 2014 Dem Boys Seh, Features / Columnists, News

Donald was a trusting man. He believe that he party and de people who he put in position was wukking in de interest of he and de people.
He didn’t realize that dem was wukking in dem own interest. De man ain’t done one term and people done planning to get rid of him and bring back Jagdeo.
At one time de nation believe that he was in a coma. He see nuff thing happening round he and he didn’t even know wha going on.
He see de Marriott build and he himself don’t know who is de private investor. Two years pass and Brazzy, that fat crook, can’t tell Donald neither de nation bout this investor.
De Amaila Falls was dry and dem ain’t tell he nutten. De same people tell he to expand de airport when only four plane does land here.
Dem mek he believe that once he expand de airport more plane gun come.
But Donald ain’t sleeping no more and is Jagdeo wake he up. He Jagdeo do de gods and Donald didn’t seh nutten because he try fuh hide he faults just to protect de party.
Nuff of dem still believe that dem can shelter under Jagdeo or hide behind he. Donald pull de plug pun Jagdeo. And you know wha start fly. De men ducking and hollering and trying fuh hide. If you see spray all over de place.
And all this come about because of polling. Jagdeo paper seh that de opposition poll he and dem ain’t find nutten better than he. And he seh suh wid a smile.
He suh love de polling that he ain’t satisfy wid de story in he own paper and he own radio, he start fuh distribute it. He send it to de Chronicle. De people at de Chronicle decide that he get wha he want— a good poll.
Well dem boys seh according to Granger de Green Shut man and Rum Jattan, none of dem never poll Jagdeo. Rum Jattan seh that he had to be drunk fuh poll he and dem ain’t got enough likker fuh get he suh drunk.
As fuh Granger, he seh that he nah got de staff fuh poll Jagdeo.
De boys seh that de only other poll he can get is from GPL and GPL seh dem short.
Talk half and find a proppa poll fuh Jagdeo.