Dem boys seh...Rohee seh Jagdeo never thief

Dem boys seh…Rohee seh Jagdeo never thief

Mar 19, 2014 Dem Boys Seh, Features / Columnists, News

Tuesday was a day when Rohee tell people that public servants ain’t corrupt. But in de same breath he tell dem same reporters that he had to set up a website name ‘I paid a bribe’ fuh ketch dem police who corrupt.
Is then de things get hot. Uncle Adam ask he if when he sit down and watch how he colleagues move from rags to riches since dem join de government, if he don’t want to ask dem how dem doing it.
De man seh that some of dem wuk and save, and some of dem never wuk and get. Dem boys want he explain that same sentence; “dem never wuk and get.”
De question move to Jagdeo. Anil Nandlall who do de transaction when Jagdeo seh that he sell he house, announce big and bold that Jagdeo didn’t got nutten when he tun president. But Rohee seh that Jagdeo had.
He seh that Jagdeo wuk at State Planning under Haslyn Parris and save every cent because he did live at he mother and he was a bachelor. Then he tun Junior Finance Minister and he never spend a cent of he salary because he did live wid he mother and father and he was still a bachelor.
Dem boys remember when he and he wife separate in 2007 he seh that didn’t have money, that all he got is $5 million. And he was president. Well four years later he win lotto and it couldn’t be de local one. It had to be lotto and de Powerball at that, in de United States.
People seh one of de chandelier in he house worth $50 million and dem boys believe that. But he did already own a house which he and Anil seh dem sell fuh $120 million, but dem boys know different.
Dem boys seh that is only he house worth so much in that area. Do de Maths and that money plus all wha he save couldn’t build de mansion that he put down near de seawall.
Rohee get vex and start knock down he hand pun de table. At one time dem boys believe that he hand woulda bruck. Instead, de table bruck. But Rohee smart. He nah seh that dem nah thief. He seh that he na agree that dem thief.
If dem tek that is not thiefing.
Talk half and watch how Rohee can dream.