Dem boys seh...Sam put on he dhoti, and Donald wining

Dem boys seh…Sam put on he dhoti, and Donald wining

Mar 17, 2014 Dem Boys Seh, Features / Columnists, News

Phagwah is a time fuh celebration and nuff people gun celebrate. People does also do strange thing. Dem does wear clothes that dem don’t even know how fuh wear.
De Indian High Commissioner does invite all dem diplomats and all dem government people to celebrate. Sam don’t miss this celebration. De food does attract he, suh he does mek sure that he put on he khurta. Dem boys see he when he go to Guyana Stores to buy one pon Friday.
He does look strange but a Black Muslim wearing a dhoti gun look strange too. Anyhow, by de end of de day he gun be happy. He colour gun change but then again, he won’t be de only one.
Is nuff seven curry. Sam like dhal, suh by tonight he gun be sitting down pun de bowl while de rest of he family got to clear out de house. Donald gun be wining. Dem boys hope that he don’t slip out he hip.
However, fuh most people, de celebration is de only time dem does get to bathe. Dem boys see people who lef dem house just fuh let people throw powder and abeer and water pun dem.
Some of dem don’t get water in dem house because GWI cut dem off. That is why dem going to play Phagwah.
Some people does use de celebration to recover. Dem been to Clement birthday party and de man put out de drinks. As Minister of Home Affairs he had no shortage of likker.
Dem boys now understand why so many police been raiding dem illegal likker shop. Dem seize all de foreign likker. Rohee get most and since dem colleagues in de Cabinet love a likker, people can understand wha happen last night.
Of course Ash Knee walk wid a driver because every time he drink and drive he does get de Bee, de Yong one, fuh go and settle wid de people who get lick up. In fact, dem boys seh that de driver had to sleep in de car because Ash Knee drink suh much that he end up sleeping in one of Rohee chair.
But today is fuh de real celebration. Talk half and Shub Holi.