Dem boys seh...Ah Kneel hijack Hap New amendments

Dem boys seh…Ah Kneel hijack Hap New amendments

Mar 15, 2014 Dem Boys Seh, Features / Columnists, News

Old people always seh that monkey does mek he pickney till he spoil am. Dem got another seh that when people ain’t got nutten to do dem does use a perfume bottle fuh a toilet bowl.
Ash Knee had nutten to do suh he mek a $5,000 note. Everything was going good; was easy fuh dem minibus got problems finding change fuh $500. Now because Ash Knee want people remember him he mek this $5,000.
Dem boys seh that he was probably thinking of how much money he could pocket without anybody noticing. But he causing problems fuh nuff people. Market people frighten de money; dem stores don’t want see it and wuss of all, dem men frighten to walk wid it when dem drunk because dem gun mek serious mistake.
De other one, he de Ah Kneel, mek a mistake too. He come out and tell people how de chief legal draftsman got a problem wid de amendments that Hap New mek.
Then de draftsman come out and seh that Ah Kneel lie. Ah Kneel get vex and decide to use he powers. He tell de draftsman that de man got to give he de Hap New amendments before he give de parliament.
This is a man who claim that de opposition delaying de Bill. But he tek de amendments and he mek he own amendments. Dem boys want to know if is not more problems he creating.
Now de Hap New people calling he a crook and a destructive element. But de truth is that Ah Kneel defending he wuk. He believe that he got to peep everything suh he peep wha de draftsman do. Normally, when a man thief, he does wait fuh li’l time pass before he use wha he thief. Ah Kneel use de people amendment before even dem see it.
People now calling he a scamp and he is de same man who sue de Waterfalls paper because de paper h9int at he scampishness.
Talk half and keep you eye pun Ah Kneel.