Dem boys seh...Ah Kneel and Rob de Earth fighting fuh Donald chair

Dem boys seh…Ah Kneel and Rob de Earth fighting fuh Donald chair

Mar 12, 2014 Dem Boys Seh, Features / Columnists, News

De more people think about wha happening in this country de more some does get sick but de majority does laugh. One man laugh till he end up in hospital wid lockjaw.
De things some Government Ministah does do fuh publicity enough fuh mek a office assistant feel shame. Some does do de office assistant wuk and mek it into a publicity stunt.
Ah Kneel, de man who sue de Waterfalls paper, love publicity more than he love he wife. He call de Chronicle and tell dem wha photo of heself to use wid a story.
He drive a big fancy vehicle, waste de taxpayers’ gasoline to tek two new law book and mek a presentation to UG. He pose wid de Vice Chancellor. He end up watching de camera more than he watching de presentation. Now dem boys want to know if an office assistant couldn’t carry up dem two book pun a motorbike and hand de UG man.
But Ah Kneel want people see he in front of de camera. Then he demand that de Chronicle to print de presentation photo. Dem boys woulda never see de photo if somebody from Chronicle didn’t call and tell dem.
But if you think Ah Kneel bad, Rob de Earth wuss. That is a man who does tek out he own photo and send it to de media. If is not photo he does send video. Dem boys seh that he does do he own writing fuh de Hard Times paper, INews, Chronicle, Channel 65, Hen See Hen and Aunty Geenah. Even when he going to de toilet he tekking out photo which he does send to all dem media house.
Rob de Earth and Ah Kneel don’t agree. Jagdeo did like Rob de Earth but now Donald like Ah Kneel. De two men want to be president, like if some horse dem riding. Is like when children deh at a fair. Since one jump off de pony de other one fighting to jump on.
Well dem boys seh that if de presidency is horse, Ah Kneel and Rob de Earth gun tear off one another clothes fuh get a ride. Dem boys know that dem two men would stop at nutten but if Donald continue how he going he gun kick Rob de Earth far.
Talk half and watch how dem two man might kill mattie fuh Donald chair. And Donald d-sure got another term.