Dem boys seh...Jail Brazzy quick

Dem boys seh…Jail Brazzy quick

Mar 11, 2014 Dem Boys Seh, Features / Columnists, News

Brazzy, de fat crook, think that de whole nation is a bunch of idiots. He suit down an tell de nation plenty things. Everything is lie and dem boys challenging him any time to deal wid de issue. He tell so much lie that he getting de face of a liar. Watch it good.
He tell de nation that some shares wha he buy in a company that shoulda gone to de government go to he buddy when in fact is he own shares. That is one of de million lies that he tell. It also one of de many secret deals that he involved in.
Some of de new lies is that he gun tell de nation de names of who invest US$8 million and gun own de Marriott Hotel. That was to happen last year end. He confuse. He and Jagdeo and Bobby and de other Bees don’t know who name to put. Dem weighing de options.
Dem boys don’t mean fuh lef it down and people got to go to jail. Is de taxpayers money and de taxpayer ain’t getting no interest, no nutten although de nation put in US$20 million. De only way dem gun get money is if de hotel mek money.
Imagine Brazzy telling people that some scampish investor gun put in US$8 million and end up owning de hotel. This investor, according to de fat crook, gun get a high interest rate pun he US$8 million whether de hotel mek or don’t mek money.
This is de scampish thing that Brazzy pulling pun de Guyanese people. Brazzy tell this nation too, that Republic Bank would put together some people who gun raise US$27 million. This was to happen by de end of last year. This nah happen.
But something strange happen. Brazzy seh that is only de taxpayers US$20 million put in pun de hotel and de hotel near done. That look like de rightful cost to build de hotel. De other money was just fuh fatten some people pocket.
Nowhere in de world any hotel cost $60 million to build and furnish one room. Dem boys seh Brazzy got to explain if he putting diamond bed and golden mirror in dem room fuh he see he fat self.
Lie? That is beyond lie. That is scampishness to de max fuh tell this nation that it cost US$300,000 to build and furnish each of de 200 room in de hotel.
Talk half and jail this man quick.