Dem boys seh...GT&T getting push out

Dem boys seh…GT&T getting push out

Mar 04, 2014 Dem Boys Seh, Features / Columnists, News

All de talk and all de promotion that GT&T got bout talk fuh two and get de rest free gun done just now because GT&T going out of business. Bobby pushing dem de out of business. And is Jagdeo mek that happen. He give Bobby and he kavakamites de airwaves. He give dem radio, TV, de cable and he deny GT&T a chance fuh expand although de company apply fuh years.
And is not dem boy seh suh. GT&T mek that statement and people get shock when dem realize that GT&T mek people talk to de States and all over de world after a time when people had problems calling even Bartica because it use to tek three days fuh place a call.
He got he friends stringing dem cable pun de GPL pole and throwing dem down and de people got to pay to fix dem back.
Dem boys read something that a young girl write de other day. She seh that when you show a girl that you don’t care she does chase you. And when you show a woman that you don’t care she does replace you. Jagdeo and he kavakamites showing de nation that dem don’t care. After all dem use de public treasury like if is dem piggy bank.
Dem boys seh that de people ain’t gun chase dem nor replace dem. De people want jail dem and is nuff jail time fuh all of dem. Brazzy de fat crook got to get a special cell fuh he alone. Then Irfaat and Rob de Earth gun geh one. Don’t ask who Jagdeo gun share he cell wid.
Dem sell de people share in GT&T and tek de money. Some people believe that de money gun in de Marriott but de same Brazzy seh that is government money that spend. He ain’t seh that de money come from GT&T suh dem boys draw dem own conclusion.
Imagine that GT&T start wid internet. Now Jagdeo friends providing internet and boasting bout 4G while GT&T still struggling fuh cope wid all dem people who want GT&T service. But is only time wid dem. That is wha dem boys seh.
Talk half and wait fuh de backlash.