Dem boys seh...Knock got knock back

Dem boys seh…Knock got knock back

Feb 22, 2014 Dem Boys Seh, Features / Columnists, News

People who know police know that when dem do stupidness and get arrest, dem does feel de weight of de law in more ways than one.
Dem police in de station does sit down or stand up pun de criminal. Then some of dem criminal does feel de weight of de baton in more place than one. Some does get some real blows that it you tell dem fuh seh that dem rob Jagdeo dem would seh suh.
But some people got long memory. Dem does remember who beat dem and when de time come dem does return de favour. Tek a man who was Assistant Commissioner. Normally criminals don’t trouble police, present or past. But a criminal trouble de Assistant Commissioner. Was real disrespect because de gunman even knock Clinton pun he head.
But dem boys also know that these days some criminal don’t have sense. Who gun go and thief and walk wid he ID card? De one who attack Clinton not only walk wid he own, he also lef it at de scene.
Is just like de contractor in de North West. This is a man who de government like to give jobs and this is de man who does always end up wid more than he should. He love to thief whatever he see on de project site.
He just like de criminal who lef he ID card at Clinton house. He does tek wha he thief and hide it in he house. That is how de police ketch he de other day.
De man doing some wuk and he happen to be near to an electricity project. He thief de people electrical fittings and put dem in he house. But somebody see suh when he gone behind de Regional Chairman daughter de police go behind he. Dem find more than dem been looking for.
Dem boys can’t understand why he ain’t get charge but then again, that don’t happen under this government.
Talk half and watch how more people thiefing.