Dem boys seh...Trouble mek Ganga cry

Dem boys seh…Trouble mek Ganga cry

Jan 29, 2014 Dem Boys Seh, Features / Columnists, News

De people seh that trouble mek de monkey eat pepper. Well trouble mek nuff thing happen. It mek two teenage boys get ketch wid a gun more big than dem. Somebody pay dem to drop off de gun suh a man can slip it in de jail to cause more trouble.
Dem boys see two police ranks coming and de next thing dem know is that dem throw way de gun. Dem in jail.
De same trouble mek some reporters announce that dem know Ganga story. Before bird wife whistle de story gone round how Ganga is a new father. De story mek de big man cry. But when he threaten fuh lock up all dem who scandal he name de story tek a turn.
Dem boys seh that this was a man who like he skirt. He was like chicken hawk and when he miss he use to ketch grass. That is wha put he in trouble. And that is wha dem media people start fuh talk about. But de devil got a friend.
Up comes a woman minister and she know that Ganga had only one woman wid he wife and that she was an adult. Tiger Woods didn’t get away wid that excuse, Bill Clinton try it and he wife didn’t seh nutten, Ganga, well dem boys ain’t know wha happen, but dem know that he cry.
De strange thing is that none of he colleagues ain’t even show some sympathy. Ah Kneel did go, but all he was concerned was wid de likker. But Donald gun deal wid he when he come back from Cuba. He give strict orders that people must avoid Ganga.
Even Jagdeo didn’t visit Ganga. He did call to find out wha happen, but he keep he mouth out of de story. He suspect that Donald woulda blame he fuh keeping people like Ganga in de party.
He already got to deal wid dem who get special privilege and end up wid more money than dem can spend while de government looking fuh money fuh help GuySuCo get out of de bind it in.
Donald also know that dem thief money that coulda clean up Georgetown. That is why he vex and then he mind flash pun Ganga again.
Talk half and see if Ganga can keep out of more trouble.