Dem boys seh...Bobby searching fuh de leak

Dem boys seh…Bobby searching fuh de leak

Dec 02, 2013 Dem Boys Seh, Features / Columnists, News

People does shame when dem get ketch doing something that dem didn’t want people to see or know. Bobby Ramroop had a plan fuh tek over GCC and GFC. He would tear down de fence and mek one big stadium.
Then he would put in a world class restaurant, a bar that woulda mek Brazzy Lamaha Street bar look like a fowl pen. Then he would even put in a place fuh people sleep when dem drunk.
Well dem boys peep de card and skin he up. Right away Bobby call off de plan but dem boys seh that if a man want something suh bad he ain’t gun run away and lef it because some people talk. It got to be that Bobby want to know who leak out de story.
Dem boys hear that he call a meeting and he had a plan. He want see who still got dem copy of de letter. If one letter missing then he gun know who leak out de plan. Nobody ain’t talking yet. In fact, dem boys ain’t even know if de meeting come off.
Anyhow, dem boys notice that every time Bobby got to get something, people does approach he. He write in statement that de GCC people invite he fuh tek dem over. Now that club been deh all de time, just like de Sanata complex. It been going about it business. Then just like Sanata, people invite he fuh tek over de place.
How come nobody else ain’t getting invite? Perhaps nobody else ain’t got money but that is another story. Most people got to hustle fuh dem money while some people does have it fall in dem lap. In de case of Bobby, money just keep dropping in he lap.
Some people at GCC know that and dem get vex when de thing get skin up. Dem boys want to know if some of dem did get a promise. These days people does drop a raise whenever dem want something suh dem boys want to believe that some people had dem eye pun a raise and when money flowing like water a raise is nutten.
Talk half and see if Bobby find out wheh de leak been.