Dem boys seh...Is only some theifing people does get ketch

Dem boys seh…Is only some theifing people does get ketch

Sep 21, 2013 Dem Boys Seh, Features / Columnists, News

Dem ain’t got nutten like a freeness. That is why dem got so much people thiefing. And is not ordinary people alone thiefing. Two men tackle an MP son who been to de bank fuh draw some money fuh build he house.
Dem boys seh that these men following de government people. Dem rob and shoot de man right outside de court. Dem got police at de gate but dem boys didn’t care. That is belly.
People believe that everybody see how thiefing become a national past time. People ain’t got to wuk or as dem boys seh, de hardest part of de wuk is staking out de candidate. De only thing is that de money don’t last dem no time because dem sporting every cent.
When dem boys look at how Brazzy building de Marriott is just like dem thieves pun de road. Dem lef home wid nutten and dem start to construct. De money done but dem got hope fuh a big pay day. Dem boys want to know is who give dem criminals pun de road de same idea. De money done pun de Marriott but Brazzy know that a mook coming along wid money, just like how de MP son come wid money fuh de bandits rob.
In this day and age people shouldn’t walk about wid nuff cash. Dem have cheques and dem have credit card and debit card. If you got to pay people give dem a cheque; force dem to open a bank account. Anyhow, people who thief does get ketch. Was big commotion at de court de other day. All de money dem thief now got to pay lawyer; and besides, some of dem gun end up begging. Is a good thing de government don’t hang people no more.
But de big thieves ain’t getting lock up. Dem getting ketch every day but is like throwing water pun duck back. Is like no jail ain’t big enough to hold dem. But as dem boys seh, time longer than twine.
Talk half and keep an eye pun de thieves.