Dem boys seh...Freeness does mek people sing sweet

Dem boys seh…Freeness does mek people sing sweet

Sep 20, 2013 Dem Boys Seh, Features / Columnists, News

Birthday is a time when people does either spend or have people spend pun dem. Is also de time when all of a sudden friends who never talk to people whole year suddenly find time to talk to dem. Was Nigel birthday and people come from Timehri to wish de man happy birthday.
These was people who wuk wid he brother and all dem use to call he brother Mecca. Dem hear was Mecca birthday and since one size fit all dem tun up to wish Nigel happy birthday. De drinks was li’l slow in coming but when it come people eye light up. Some of de same people didn’t have time to mek speech.
One lady sing till she believe that she was a canary.
But dem had people who had nice words. All of dem talk how de man is so good that one lady decide that if this Nigel dead before she, she would not be going to de funeral because if de man alive and people talk suh nice, imagine wha dem gun seh when he dead.
But dem had other things that mek people shake dem head. Brazzy is de man behind de Marriott. He tell de nation how dem private people put in dem money. Well when dem boys ask question dem find out that no private people ain’t put in money. Is only de money that Brazzy put in build de hotel. De wuk now stall.
Of course don’t talk bout de panic. Brazzy deh begging round fuh money because he telling everybody that he don’t want no white elephant. When dem boys ask he bout de white elephant he claim that whatever done build gun represent an asset.
But dem boys smell a rat. De man certain that he gun get de extra money. He boasting bout some private investor. Dem boys seh that is a Guyanese who got nuff money and who just passing some through an offshore banking system.
He did admit that Republic Bank done tackle some other local businessmen. And all this happen when Bharrat heself did talk how dem got foreign people line up.
Talk half and keep you eye open fuh de scampishness.