Dem boys seh...Thiefing rampant in Government circles

Dem boys seh…Thiefing rampant in Government circles

Sep 11, 2013 Dem Boys Seh, Features / Columnists, News

Money deh all over de place and people doing all kind of thing to put dem hand pun it. Some of dem does forge documents like de people who drunk an old man and claim how he sign over he house to dem. De situation get serious because de Americans get involve. De old man is an American citizen.
That is how dem boys find out that people pay de police because when people call pun dem de very police claim how dem can’t go to de scene. Dem go one day when somebody tell dem that de Americans ain’t gun give dem visa.
But that is petty tekking. De Sharma boy who wife wukking wid Brazzy finds heself in a dem seh because he hardly prepare some statement fuh de fuel Guyana buy and wha he workplace sell.
He workers see wha going on and dem and all decide that dem gun tek. Dem hold up a lady wid a fuel tanker and demand one Michael from de lady.
De problem is that she talk and Sharma people get hold. When dem call de boss and tell he that police hold dem de boss man tell dem that dem stupid to get ketch and that dem got to face de music.
Chris Ram check and he find out that everybody hustling. He was de one that find out bout de Amaila Falls hustle that cause de project to cost more than two times de real price. Dem boys shut down that project.
Is now people seeing wha happening. Contractors tek government money and run after de project meet halfway. De government trying to collect de money and this is one old story. De thing is that some of dem contractor don’t even worry to pay back de money because dem seh that others in de government thief more than that.
Talk half and keep watching fuh de thiefing.