Dem boys seh...Some people selling dem house

Dem boys seh…Some people selling dem house

Aug 15, 2013 Dem Boys Seh, Features / Columnists, News

If Amaila cancel fuh now then Guyana save money. Of course Guyana always want every cent it could get but people was prepared to forget de money that de country spend on Amaila so far. Is more than US$20 million but nuff people rather lose that than de US$1 billion dem feel that dem woulda lose.
Fuh one, de people who plan de hydro use GPL as a scapegoat. Couple blackout and everybody suddenly want something better. That was de plan and it wuk. De next part of de plan was to sell hydro as never ending power—no more blackout.
Jagdeo allow GPL fuh run down. De GPL people even talk how fuh ten years dem never get a cent fuh repair equipment. In some case, dem rent generator which dey woulda done pay for, if dem did tek de rent money fuh a year and buy. Instead dem rent dem generator fuh a year and give dem back. De GPL people boast how dem didn’t have to pay fuh repair. De system collapse.
But Amaila ain’t dead. Dem boys asking de government to review de project. Dem got nuff other company who come in to replace Sithe Global and people sure that de cost gun be cheaper. Why dem ain’t tender fuh de project is something that got people scratching dem head. Is not that Sithe Global is de only people who could build a hydro dam.
People forget that IDB was de first to ask questions. When Brazzy talk how de people who involve in de project had to do dem own due diligence, he didn’t realize that de IDB woulda really do one. Up to now dem ain’t release dem report. But dem boys sure that Sithe Global know de answer.
Now, some other company sending message to de government, but it look like if de government ain’t want talk to nobody right now. Perhaps dem busy trying to wuk out how dem gun give back de money dem collect. Some people already selling dem house but people ain’t mek de connection yet.
Talk half and watch de housing market.