Dem boys seh...Amaila was like dem beat man

Dem boys seh…Amaila was like dem beat man

Aug 14, 2013 Dem Boys Seh, Features / Columnists, News

Donald still thinking ‘bout Amaila, but dem got people who believe that de project dead. And is now de nation hearing that de money from Norway was going into de project.
But that done. Now dem boys watching to see wha happen wid all de talk about de loan. From de start people been asking de government to explain wha really happening wid de project.
Of course de government behave as though was a family secret and talk ‘bout confidentiality. Is now de very government trying to share all de information dem have. But people know that de project can still go on.
Amaila is one thing. Madness is another. It look like if dem man ain’t got respect fuh no woman. Dem boys seh that it certainly can’t mean that dem don’t respect dem mother and sister.
A minister begging woman fuh lef dem man who beating dem. Wha de minister ain’t telling dem same woman is wha help she gun give dem till dem find dem foot.
Everybody know that nuff woman does stay wid dem man who does beat dem because is a case of rice in de pot and a roof over dem head. And de same minister would see a man beating a woman and run fun cover.
But dem boys seh that talk fuh rain and talk fuh sun, she does mek sure that all who like beat end up in jail. A man did slap he wife and de minister hear. She mek sure de police get involve and de magistrate play a good part.
Yet dem same woman when de court ready to act, does beg de magistrate fuh sorry fuh de man. De AFC behave in de same way when it had to vote pun de Amaila project. De project was like de man who beat he woman. When de beating was going on, Prakash holler how he ain’t gun support de project.
When it come to putting pressure, just like going to court, Prakash tun and tell people how he ain’t want bruck up, how he begging fuh a chance. Well in this case de beat man walk way and Prakash deh crying. De minister tekking note.
Talk half and tell de world how Guyana lucky.