Dem boys seh...Nobody ain’t talking de truth bout de hydro

Dem boys seh…Nobody ain’t talking de truth bout de hydro

Jul 26, 2013 Dem Boys Seh, Features / Columnists, News

Is funny how when something important people does gang up. When a country at war, almost everybody does line up and gang up to fight who ever want to attack dem country. Well dem boys see how de whole government gang up to fight to keep de hydro project alive. Is war.
Burnham fuh all he power he had couldn’t get he government to fight like how Donald get he own to fight fuh de hydro. And Burnham was trying to build a hydro too.
Dem boys seh that de reason different. In this case is nuff money and people want dem cut. If de project fail then some of dem got to pay back wha dem tek. Imagine dem call a forum to answer all de questions about de project but dem ban reporters from asking any question.
Now is de reporters who got to explain to de people. But is not that. Dem know that de reporters got de real questions and dem can’t bluff. How much money de project really need? When de road gun done? Who tek money from de project and run? Why de secrecy when de government talking bout any project? Dem is de real questions.
Donald ain’t talking bout that. He know that de hydro is a good thing but is de price that got dem boys worried. Who fix de price? Why de price climb up after de contract sign and climb suh till it can’t climb no more?
And de man who bring de project and all de strings attach ain’t uttering a word. Jagdeo arrange all de money; he arrange de contractor; he arrange Fip and now that people asking question he ain’t saying nutten. Is like he lef Donald wid de big swelling below de waist.
Dem boys seh that hydro is a good thing. It gun bring cheap power if dem do it right. But de way things looking, and de way de contract fashion, Guyanese gun have to pay fuh de imported fuel and de hydro at de same time. That gun mek de electricity cost go up.
But then again, Bharrat ain’t saying nutten.
Talk half and prepare fuh more hydro story.