Dem boys seh...House is big business

Dem boys seh…House is big business

Jul 06, 2013 Dem Boys Seh, Features / Columnists, News

De crow is de only bird does wait till rain fall before he build he house. Dem had some Guyanese who was like that. Dem got some birds that does thief nest. Dem does wait till some bird build a nest and lay eggs, then move. Of course dem still got a couple people who like that. Dem does move in house wha people build and tek it over.
Is a dangerous game because dem does even get document to tek over de property. Burnham and Cheddi did know bout that suh dem had a housing programme. Dem didn’t have money like nowadays suh dem housing programme was nutten fancy.
Today, though, is a really big housing programme and it paying off. Dem boys was shocked to hear that all de house lots give away pun de East Coast. Dem boys know that Eddie Boyah got land fuh build house pun de same East Coast. He buy from de government and dem boys waiting to see if de government will buy it back.
And dem boys notice that in a quiet move Irfaat moving de capital from wheh it deh. He setting up a place called Silica City up de highway wheh global warming can’t touch it. Is nuff land up there and Silica City gun be a powerful place especially since de contractors don’t have to go anywhere fuh de sand.
Now if that is to be de case dem boys want to know wha gun happen to Pradoville2. Dem wouldn’t be surprised if all of a sudden de people who live in Pradoville 2 give way dem house and move into Silica City.
De building expo mek nuff people open dem eye. Dem bank got so much money that dem set up booth and beg people to borrow. De contractors show off some nice house and some of dem who been last year ain’t show this year because dem busy building house fuh sell. Dem ain’t got time fuh exhibition.
Talk half and watch de housing situation.