Dem boys seh...Donald got ring in he nose

Dem boys seh…Donald got ring in he nose

Jun 23, 2013 Dem Boys Seh, Features / Columnists, News

When ordinary people owe de government most of dem does lose everything dem got because de government got to get its money. When people owe de government and nutten ain’t happen is because dem is de big ones and dem accustomed to tekking money from de government.
Brazzy know that he had a kickback wid de Amaila Falls road suh when Fip had to get a performance bond he demand that Fip use de li’l Brazzy insurance company, Hand in Hand. De big Brazzy was de one who buy all de extra shares in Hand in Hand fuh he buddy; he sign fuh de shares and he keep dem. That is how he coulda demand that Fip tek de bond. In fact the just sign two paper and give Fip de bond.
Well dem boys know that Fip woulda buss de contract. Now de government want de money he owe dem and de only place dem can get de money is from de performance bond. Now if Brazzy give Fip de bond and de contract, dem can’t expect Brazzy fuh tek he own money to pay fuh de contract.
Luncheon and Donald and Ash Knee ain’t even going to court. That money gone fuh channa. But like anything that Brazzy touch, is only talk that money spend. No money ain’t spend fuh buy de GPC.
But dem boys seh that Donald vex because dem boys play he like if he got a ring in he nose.
And is now dem boys know how much Bobby buy de franchise for. Trinidad paying US$2 Million for that franchise. Bobby buy he own fuh US$2.5 million. But all dem boys asking, nobody wasn’t talking. Dem had to talk in Trinidad, though, because people dopes go to jail fuh hiding money transactions.
For example, de people who buy got to come forward. Fuh de Guyana contract, only Bobby come forward. He real backer stay in de background. Bobby put US$500,000. De real owner put US$2million. Dem boys believe is Jagdeo because he and Bobby like Batty and Po.
Talk half and wait fuh more story buss out.