Dem boys seh...De big ones got to tek de test too

Dem boys seh…De big ones got to tek de test too

May 19, 2013 Dem Boys Seh, Features / Columnists, News

Is a long time since de government been complaining about drugs in Guyana. Jagdeo tell de Americans that if Guyana got to win de fight it got to get help. De Americans decide to give a small piece and some communication equipment.
When Jagdeo tell he that dem got to give more money de Ambassador tell he that de only way he gun get money is if he show that he serious bout fighting drugs. Of course Jagdeo get vex. That is when de Americans tell he that dem gun set up a DEA office in Guyana. Well is now dem boys know why de country still can’t get de DEA office.
To begin with, if de DEA come in Guyana nuff people who seh that dem is Jagdeo friends gun end up in jail. And then he gun get nail because people gun talk how dem see nuff of dem people sporting wid he. Old people seh, ‘Show me you friends and I will tell you who you are.’
Is de same Jagdeo who bring in polygraph testing. But de only people he test is dem li’l people. He ain’t test dem big ones. Dem boys seh that he shoulda been de first one to tek de test and lead by example. That ain’t happen. He know why he ain’t tek de test.
People still want know how he get de mansion. He and all dem Bees should line up fuh a polygraph. Dem boys know de results and some might end up in South African jail. Brazzy and Barbie might end up in Zimbabwe jail when Uncle Sam done wid dem.
Donald already asking fuh all of dem to tek de polygraph. He seh he gun lead by example. Dem boys seh that he might end up tekking de test wid only a few people he gun lef wid to wuk in he administration.
Dem boys want to know if Sharma, de GEA boss gun tek that test. De CANU boss, Singh, did tek it. He lead by example.
Talk half and wait fuh see who gun tek de test.