Dem boys seh...Craziness tek over Guyana

Dem boys seh…Craziness tek over Guyana

May 11, 2013 Dem Boys Seh, Features / Columnists, News

Is madness and more madness. A man going home across de Harbour Bridge and nearly end up in de river. Dem boys seh that when de man see wheh he was going he behave like if he drink Epsom salts and cascara at de same time.
Then Jagdeo seh that Guyana lose all its skills. Well some criminals show that dem got skill. Dem mek a bomb pun de spot and blow up a house in a place wheh people coulda sleep wid dem door open. Dem kill two people. One of dem who dead was a woman.
Criminals normally spare de woman life as dem vigilante in Berbice show. Dem beat de man to death but dem just brush up de woman.
A man kill a young girl and heself because he want married and he mother tell he that he should get a house before he think bout wife. Dem know that people losing faith because even de government losing faith.
Some reporters try to find out about Amaila Falls hydro project and dem hear de disappointment in de Lunch Man voice. He tell dem reporter how everything is only promise at this time. But when dem go to parliament fuh de money last year and this year, dem was certain because dem see money.
But from de start people had problems wid de project. Jagdeo talk too smooth and Brazzy was more smooth. He was sure that Fip Motilall would done de road. Now dem boys can’t hear a peep from dem and de Lunch man only groaning how things ain’t too nice.
It got to be sheer madness in this place.
Talk half and watch more madness.