Dem boys seh...Kwame tell Curacao people he been pun a board

Dem boys seh…Kwame tell Curacao people he been pun a board

May 04, 2013 Dem Boys Seh, Features / Columnists, News

Dem had de UNESCO meeting on World Press Freedom in Curacao de other day and of course de Waterfalls boss man and some other local media people get invite. Next thing dem see Kwame tun up. De people didn’t expect fuh see he but dem boys know that he love to tun up and dem get a chance fuh hear he confess to tunning up.
De meeting start and de Guyana radio issue come up. Kwame listening. English talking and he pick up de head phone fuh listen to de translation. Everybody start watching when de Waterfalls boss man and Henrico point at he and start fuh chant “thief”. Dem seh he is Jagdeo stooge and he been pun de board that advise Jagdeo to give way de licence and to who.
De people ask he if is true, and all he could do is hang he lip. Is like he couldn’t understand wha de people ask he.
Kwame seh he sit pun a Board and he sure nobody else ain’t been pun that board. He grumble something bout some Julius. And de people ask he if is two people been pun de board, then. He seh is he alone been pun de board. Suh dem ask who is Julius, then? He seh Julius does wuk under he. Henrico, Glenn and Nazima was de only people who understand wha he mean. Dem is Guyanese and know he story.
When de people ask he de Kwame why he stay pun de board, he seh he is a man who does cry fuh go pun board sometimes. Jagdeo did put he pun one but that didn’t satisfy he. He guh by heself pun this other board and nobody coulda tek he off.
Dem boys seh is a miracle Julius ain’t get five frequency too.
Talk half and ask youself who else been pun board.