Dem boys seh...Everybody criticizing Jagdeo radio deal

Dem boys seh…Everybody criticizing Jagdeo radio deal

May 03, 2013 Dem Boys Seh, Features / Columnists, News

Everybody now talking bout de way Jagdeo give out dem radio concession. De other night de Americans had to talk bout this thing. Dem want to see a fair distribution and when dem talk dem serious.
Of course, dem boys expect that Donald gun tell dem that dem pushing dem mouth in de internal affairs of Guyana. But as everybody does seh, mouth open and story jump out.
But everybody know that de radio thing is embarrassing to de country and Donald should do over de whole thing. Ah Kneel seh that when Jagdeo share out de licence he mek sure that he tek de ethnic thing into consideration.
That cause dem boys to seh that Jagdeo like he friend who invite ten people to dinner. He give five of dem one egg and he give de other five chicken and mash potato and greens and sauce fuh de potato. When he done he tell people how he feed ten people.
In fact is only three people get de chicken and de potato and de sauce and de greens and dem was he friends.
Dem boys seh that he did feed ten, but is if he was equitable. That is just wha Jagdeo do. De matter deh in court and dem boys don’t want talk too much bout it, because de next thing is that dem can end up in jail.
But dem can talk bout other things. Dem can talk how Berry Berry nearly kill some people because he don’t like dem. He did refuse to give a licence to de cancer centre fuh give people radiation fuh dem cancer treatment. Is when dem boys open dem mouth and Donald put some pressure pun he that he bow.
That mek people believe that he had something to do wid people paying on de side fuh dem cancer treatment.
Anyhow dem people getting dem treatment, but de delay really got some of dem in a bad way that one got to wonder if any treatment can help dem now. But dem boys seh that Berry Berry days coming, not that dem wishing anything pun he.
Talk half and pray fuh Berry Berry