Dem boys seh...Donald tell Uncle Sam fuh tek a jump

Dem boys seh…Donald tell Uncle Sam fuh tek a jump

Apr 27, 2013 Dem Boys Seh, Features / Columnists, News

Donald tell de whole country that he is a big man and that he ain’t gun tek criticism from any and everybody. De man get vex because Uncle Sam tell he that Guyana human rights record ain’t good and that Donald got to do certain things to correct de situation.
Well de man get vex. He tell Uncle Sam that it ain’t got no right to talk down to Guyana. Is a case of pot telling skillet that he bottom black. But Donald ain’t stop there. He tell Uncle Sam but it own human rights record—things like torture by waterboarding and de condition at Guantanamo. He seh that he ain’t frighten Uncle Sam because he don’t thief.
Was de same thing when Uncle Sam decide to squeeze Guyana pun human trafficking. Was Jagdeo then and he mek dem know that things like that don’t happen in Guyana. De same Jagdeo did get vex when Uncle Sam tell he that dem can’t give he money fuh fight de drug trade because he wasn’t ketching anybody.
Donald seh de same thing to Uncle Sam and he ain’t going out of he way to help dem wid an office of de DEA.
But some of dem who deh close to he get nervous because dem know that Uncle Sam does get vex at a flash. Dem now wondering if when dem travel if somebody in Uncle Sam, like de Feds, gun put hand pun dem.
Dem boys know fuh sure that some of dem deserve. Uncle Sam talk bout how nobody ain’t getting charge fuh corruption and how some of dem don’t even listen to de Auditor General.
Dem boys know why nobody in Uncle Sam give Bharrat a doctorate. Although de man recognized in many countries Uncle Sam seh, “Not here.”
And while Donald cussing Uncle Sam, South Africa decide that it gun honour Burnham. He was one Donald cuss too. Dem boys waiting to hear wha he gun seh when Burnham daughter get de award.
Talk half and wait fuh de reaction.