Dem boys seh...Is now dem talking

Dem boys seh…Is now dem talking

Apr 26, 2013 Dem Boys Seh, Features / Columnists, News

Mouth open story jump out. Dem boys watch wha dem do to de Cheddi Jagan International Airport and talk every time dem vote money fuh de airport. One time in parliament dem vote couple hundred million fuh do de viewing gallery and de opposition object.
That was de time you could object all you want and nutten use to happen suh de very government go about and do de wuk. Next thing dem boys know was that de roof fall in. Dem put more money and build a new roof. Dem really spend money on de airport. Up to de other day dem spend couple hundred million dollar fuh mek four toilet.
After de opposition cut de budget this de story come out. Rumesh talk bout bad design. He probably was not de chairman at de time but other people had to see de design and dem didn’t know that it was bad then or dem didn’t care because dem was sharing money like rain.
Is some of that money help Barbie build de satellite uplink fuh mek more money. De man mek money when Guyana play international football de other day and now that Pakistan coming, he gun mek a killing. When people talk bout investment –that is investment. De Learning Channel is not even de icing pun de cake.
De airport is just like that. Whenever dem want to give money to a contractor dem do wuk pun de airport. De opposition ketch on and decide to cut de new airport because dem wanted to cut de money flow. Is just that dem hand slip and dem cut too much.
Is not everybody can tek de crookishness and dem boys gun talk bout that very soon. Some people does walk away from de using. Dem is de decent people and dem gun sleep when de night come. But dem got de set who believe that money never enough. Dem is de people who dem boys waiting fuh hear about. Dem is de ones who gun end up in dem pumpkin jumpsuit and other people watching dem funny.
Talk half and wait fuh more story.