Dem boys seh...Look who talking

Dem boys seh…Look who talking

Apr 14, 2013 Dem Boys Seh, Features / Columnists, News

Is nuff noise bout budget cut and things like that. Donald and some of he Ministers telling de whole world that de opposition don’t have any reason to cut de budget. Well when de shoe pinching somebody foot old people seh that somebody must give dem something to sit down on.
If Donald know that de opposition ain’t got no reason to cut de budget wha reason he got fuh not signing dem Bills that de same opposition send to him?
Then eh join Gail and talk bout dictatorial attitude. Dem boys remember de movie ‘Look who’s talking’. He don’t stop deh; he go and talk bout vindictive. Well dem boys want to know who more vindictive than he and Jagdeo.
Dem suh vindictive that dem give all de radio frequency to dem friends and family. Dem don’t give de opposition party not even a branch fuh hook up to get a radio signal. That is vindictive but is Donald talking.
Jagdeo give de Mirror, he give heself and he give he niece husband. He don’t give de Waterfalls paper because de paper talk bout corruption. Well everybody know why APNU and AFC ain’t get none. Let Donald explain that. He got to know.
If dem boys cut de budget because dem vindictive let Donald tell de nation why he side wid Jagdeo to build de Marriott because dem didn’t get to buy de Pegasus.
Is spite mek dem now want to put de Pegasus out of business. Vindictive is another word fuh spite.
Then dem got de cable situation. GT&T bring in cable but Jagdeo decide to bring in he own cable fuh tek way GT&T business. That is vindictive too because he didn’t get a share in de GT&T network and when he try GT&T go to court.
Donald should think about dem things before he talk bout vindictive and dictatorial and who ain’t got reason to do certain things.
That is why de Good Book does talk bout tekking out de beam from you own eye before you try fuh jook out de speck from you neighbour eye.
Talk half and let Donald quack some more.