Dem boys seh...Shaatie don’t understand he own budget

Dem boys seh…Shaatie don’t understand he own budget

Apr 09, 2013 Dem Boys Seh, Features / Columnists, News

Some people was talking and dem boys hear a man seh that Guyana woulda end up wid a lot of one-hand Minister. Dem boys couldn’t understand. Was only when a man seh that in some Muslim countries dem does chop off people hand fuh thiefing that dem boys understand.
De other day in Parliament one of dem, opposition people jump up and seh that all dem Government Minister in Guyana should do a polygraph. Dem boys seh that is a pity that JAGDEO ain’t in de government no more because he woulda go to lead de Ministers. He was de man who mek some senior people tek de polygraph but he stay clear and dem boys know why. De machine woulda bruck up.
Well de call start up again. Dem got Ministers who would pass. Carolyn seh that she willing to lead de procession but she also seh that dem opposition people must follow she and tek de test too.
Right away dem boys seh that it ain’t necessary fuh de opposition to tek de polygraph because dem don’t touch Government money unless de people in de government give dem as perks or fuh keep dem mouth shut about something.
Shaatie gun surely fail because he is de man who prepare de budget. Dem boys seh that dem really believe that he did understand de budget that he prepare. Is when he go to parliament that dem know that he and all don’t understand de very budget that he prepare.
He go pun some outreach and when people question him, he couldn’t explain. Then he come to town and tell people how dem must go in de village and educate de people bout de budget.
Well if he couldn’t do it, and he prepare de budget, who he expect to do de explaining?
But then again, dem boys seh that is suh con men does operate.
Talk half and try to keep dem Minister far from dem polygraph.