Dem boys seh...Luncheon trying fuh pull wool

Dem boys seh…Luncheon trying fuh pull wool

Apr 06, 2013 Dem Boys Seh, Features / Columnists, News

Gerry got a problem wid de budget. All of a sudden he see a big flaw. De budget ain’t got nuff things fuh tourism. Nuff people find fault wid de budget but Gerry didn’t see nutten wrang till he notice that he hotel ain’t get no tax break and he still got to pay VAT.
Now everybody does think bout demself. Gerry now notice that he ain’t getting nutten extra this year suh he criticize de budget. He ain’t get nutten to put in he pocket.
But while he grumbling Luncheon showing that he is a bully. De Plaisance people seh that dem don’t want no tower pun dem playground. The very government people who building de tower decide to back off, but not Luncheon. He announce that de tower gun build right pun de playground because he seh suh.
Dem boys know that is a big quarrel gun start and everybody gun join in, which is just wha Luncheon want. He want de confusion, because it gun distract people from de real issue. Jagdeo share out de radio frequency to he friend and family and Luncheon didn’t got shame. He seh that de sharing out ain’t nutten, that all people gun remember is that radio free-up.
But people ain’t tekking that. Dem was de same people who hear when Luncheon seh that anybody who want can get one, but dem boys want to see what is right. But Luncheon creating de distraction. Once people rowing and fighting over tower in a playground, dem ain’t got time to look at de real issue. Luncheon is a smart man, but he gun get outsmart.
But dem boys seh that dem got something else. Luncheon want to show Alexei and Walter de Wicked that he is de boss. Dem two done shut down de project, but Luncheon determine that wha he seh is de law. He telling de world that dem two ain’t got no real say.
Talk half and don’t let Luncheon distract you.