Dem boys seh...Some APNU and AFC people tek Jagdeo money

Dem boys seh…Some APNU and AFC people tek Jagdeo money

Mar 23, 2013 Dem Boys Seh, Features / Columnists, News

Guyana is a place when people does do things how it suit dem. A man tek he cloth to a tailor and agree wha he want. The tailor does do he own thing and de man can only grumble. It happen de other day when a man go to de barber fuh a haircut and get wha de barber want give he. Desmond Hoyte use to walk round wid a gyal a rush me hairstyle. He didn’t ask fuh that but that is wha he get.
People use to ask fuh de radio free up and dem get wha dem want. De only thing is that dem ain’t get de freeness. Is only a few people get vex and is like if is dem alone get de problem.
De truth is that some of de people who get vex can’t seh nutten because dem get buy out. Some people in de PNC tek Jagdeo money and dem can’t talk about nutten. That is why nuff of dem silent over de radio licence issue.
Some of dem in APNU tek Jagdeo money too. One of dem go so far as to mek Jagdeo give instructions fuh one of he Ministries send stuff home to a PNC big one. De man get buy out.
AFC in de same boat. Khemraj look like if he ain’t tek money. He does open he mouth and talk bout anything when he get vex. But dem got some people in that same party who can’t even seh peep.
That is how dem boys know that money been round fuh share out and fuh buy people. And all who get buy out got to sit down in a corner like pity, pity poor boy.
Dem boys seh that nuff times dem sit down and wait fuh see who gun protest. Dem does wait forever and forever and nutten don’t happen. Dem talk bout de Marriott and nuff politician couldn’t seh nutten because dem tek Jagdeo money.
Dem talk bout de airport and again is de same thing. Is de time when Jagdeo gun ask back fuh he money. Is then people gun know who is who.
Talk half and see who could give back Jagdeo he money.