Dem boys seh...Jagdeo hijack de country and can’t sleep

Dem boys seh…Jagdeo hijack de country and can’t sleep

Mar 20, 2013 Dem Boys Seh, Features / Columnists, News

Some people does sleep and in de midst of de sleep dem does jump out of dem sleep and holler like dem see jumbie. But before that start to happen some of dem use to sleep wid a smile pun dem face. That is when dem do wickedness and dem believe that dem gun get away wid it.
When Jagdeo was planning to share out de radio licence to he family and he best friends he thought he had a good plan. When he lie down to sleep he use to smile broad. Now-a-days he don’t even want lie down because he get expose.
De first day he see de story how he deceive de nation he start fuh sweat. That night he couldn’t sleep. He toss and turn suh till he security believe that he had toothache and actually try fuh give he Advil. When he tell dem that nutten ain’t happen dem walk out. Then dem hear when he holler out in he sleep. De man behave like when people see dem dead family. Is he deeds ketch up wid he. He holler fuh Glenn and Uncle Adam.
Jagdeo ain’t de only one who can’t sleep. Rob Earth walking up and down whole night; Vishok trying sleeping pills but he find that even that ain’t wukking; Bobby walking like he in a daze suh till when people ask he some question he repeating heself. Then he does get mix up. Is not that he does lie, is just that he confuse.
He claim how de court give he dem radio station. Dem boys want to know since when Jagdeo is a court. De man get more confuse because he claim how de same court give he a television licence. He got to be de only person who get such a privilege from de court.
And while all this happening Donald claim how he ain’t know nutten bout wha dem boys talking ‘bout. Dem boys seh that he coulda do like Desmond Hoyte when he overturn Burnham policy. But not Donald; he frighten Jagdeo like how woman frighten cockroach and rat or like how some man frighten snake.
Talk half and wait fuh dem kavakamites run mad.