Dem boys seh...Jagdeo mek Bobby telling lies

Dem boys seh…Jagdeo mek Bobby telling lies

Mar 18, 2013 Dem Boys Seh, Features / Columnists, News

Guyana got to play catch up. Jagdeo suh bright that he always one step ahead of de game. When dem boys been looking at corruption, de man busy selling out de country. And nobody coulda see that. De man smart. All de talk bout corruption and nobody ain’t going to jail was a smoke screen.
If he had to jail people then de talk woulda go around suh he know that once people talk was a case of dem having something to talk about. And Jagdeo use that opportunity to look after he friends.
When he give dem all dem radio station and TV licence he planning fuh a big occasion. De man plan to return as president. He claim how he young and he can be president fuh another ten years. Well dem boys seh that if that happen Guyana dead and people gun tun slaves again like two hundred years ago.
Imagine when you tun on you radio and TV all you gun hear is Jagdeo. That is wha de man plan.
That is why he build de Marriott. By de time de hotel done and de elections come around, all he friends and family done get rich. De Marriott gun be dem playground. De man smart.
He suh smart that he got he best friend telling lie. Imagine Bobby Ramroop claiming how he get de radio station when he buy out Vieira. When de government seize Vieira radio, de man was broadcasting pun 100.1 fm. De government tek that one.
De court seh that Vieira should get a radio station but it did not tell de government what channel. In any case, was only one channel. Bobby get five. How he can claim that he buy dem from Vieira? But that is de smartness.
What Bobby didn’t know was that people know wha Vieira had. Dem boys intend to talk de whole story. Now dem boys find out more things bout Bobby and de government. But a still tongue keeps a wise head.
Talk half and look out fuh de expose.