Dem Boys Seh... Jagdeo is a selfish big man

Dem Boys Seh… Jagdeo is a selfish big man

Jan 26, 2013 Dem Boys Seh, Features / Columnists, News

Dem had big argument in Parliament de other day. De opposition seh that Jagdeo pension and benefits too big. Dem in de government seh that it just right. Jagdeo got unlimited security guards, but de opposition seh that dem must have a limit.
De Jagdeo Bill mean that he could got how much car he want, and dem didn’t have any limit to he light bill, he water bill, he phone bill and all dem things that poor people got to pay. But what really get de government people vex was when de parliament seh that if a president getting all that money and if he continue to wuk then de money must cut.
Well Donald seh that he ain’t signing de new Bill. Dem boys want know if he suh greedy because dem never see he as a man like that. But Jagdeo didn’t have dem scruples. De same parliament send other Bills to he fuh sign and he refuse or he tek he own sweet time. But as soon as de Pension Bill fuh he benefits reach he desk he sign. In fact, de boys seh that he sign even before de office assistant lef de office.
He was planning a benefits bill fuh Brazzy too and one fuh Bar Bee but Ah Kneel tek too long fuh do de draft. If he did wuk fast all de Bees woulda enjoy a benefits Bill and poor people woulda stay poor. None of dem don’t need a pension. Dem got more money than dem can spend in five lifetime and dem same people don’t even pay people what li’l pension dem deserve. Imagine dem other people in parliament does only get $20 fuh pay all dem Bills. But as dem old people seh “Moon does run till day ketch it.”
Imagine a sports reporter from de Waterfalls paper run and lef a writ that de Demerara Cricket Board was sending to de paper. De man claim how dem want serve a writ. Well dem boys seh that he had a chance to run, even if it was fuh nutten.
Dem got people who ain’t suh lucky.
Talk half and wait fuh de backlash.