Dem boys seh...Mouth open, story jump out

Dem boys seh…Mouth open, story jump out

Jan 23, 2013 Dem Boys Seh, Features / Columnists, News

Bar Bee collect money fuh renting one bond to de government. Bar Bee own two bond. When people talk how he collect rent he claim how is not true, that de government rent he bond fuh free. However, de story buss out that he did collect rent. He get ketch, but he bareface. He got de nerve to seh that dem boys wrang because de government pay he rent fuh de other stall.
This is de same man who claim that he ain’t tek no money at all. And de Leslie who ain’t got nutten to do wid de business push in he mouth.
Is de same Leslie who did seh that Guyana had more AIDS than everybody, just fuh collect dem Americans money. He get ketch wid he lie and de people stop giving Guyana money. This same Leslie did arrange wid Bar Bee fuh mek AIDS drugs and he bully de Collins lady fuh approve de drugs when de woman claim how de drugs didn’t meet de standards.
Leslie suh bareface that he send de drugs wha Bar Bee mek to Canada and to Jamaica fuh testing. De drugs fail de test and that was de end of de programme. But dem boys seh that if people didn’t watching Leslie woulda sneak de drugs into de system and mek de government pay. People woulda dead, but Leslie and Bar Bee woulda get more rich.
Wha got dem boys thinking that Guyana full of crooks is when Berry Berry push in he mouth. He is de same man who try fuh hide de high price de government pay fuh de cream, Ketoconazole. When he get corner he admit. Right away Bar Bee tell de whole world that he fix he price and people can buy if dem want. De only people who was buying was de government. He had a sure market and de government mek sure that dem buy at whatever price he call.
Is now people see how de public money use to disappear from de treasury. Dem also see how certain people get rich. De money from de Treasury pass through a factory and then get distribute.
However, moon does run till day ketch am and it look like if de moon get ketch.
Talk half and wait fuh more confession.