Dem boys seh ... Keep you eyes pun Bar Bee

Dem boys seh … Keep you eyes pun Bar Bee

Jan 19, 2013 Dem Boys Seh, Features / Columnists, News

When Sonny of Easy Come easy Go travel to Guyana to talk bout he airline he seh that he break he pension fund, pull all he savings and use he own money. When de Feds hold him, he tell dem that he know is nuff money missing and that he tek some. He change he mouth.
De same thing happening now but is a different man talking. When dem boys start to talk bout de drugs Bar Bee tell de whole country how he doing de government a favour because he storing de drugs fuh free.
When de people in Parliament ask de question, de people in de know seh that dem pay about $90 million. Dem done let de cat out de bag and Bar Bee still talking how he doing it fuh free. Dem boys seh that fuh he, $90 million is just like free because that is no money.
And he didn’t talk bout de $1.5 million he use to collect every month from USAID. That is why dem boys always seh that dem had to keep dem eye pun any deal that Bar Bee deh in. Imagine when other people tender fuh contract dem got to lodge a performance bond. In short, dem got to lodge wid a bank ten per cent de cost of de contract. Bar Bee use to get de whole contract money up front when everybody else use to get a fraction as advance. That is wha he use to call value fuh money.
Dem boys seh that any normal person would get vex and tell de government that dem ain’t able wid de bad talk. Not Bar Bee. He rather tek all de cuss because he know wheh de money deh.
One thing dem boys know, Guyana always got to buy drugs but wid people watching like hawk all who buying got to know that whatever do in darkness got to come to light.
Talk half and keep you eyes pun Bar Bee.