Dem boys seh...Don’t listen to de obeah man

Dem boys seh…Don’t listen to de obeah man

Jan 14, 2013 Dem Boys Seh, Features / Columnists, News

De road full of cars but dem boys didn’t know it was so full till people start to drive into fence and in trench. Was as if dem looking fuh more road to drive. One of dem drive into a lady shop but before that he had to drive through de fence.
That ain’t all. He jump out of de car and run away. Dem boys want to know what he was thinking.
De car got number plate and certain numbers that would tell de police who own it. If was a car he borrow then he got problems because he got to explain how he get de car.
One thing is certain; to avoid expense, de owner gun tell de police that somebody thief de car. He got to explain how de person get de keys.
Another one refuse to stop at a sign and he get lash into a fence. Dem boys seh that fence got to be de new thing.
He got to repair de other man car, he car and de fence. One man buy gas and he car ketch afire. Perhaps he use to put kero in de engine.
Just like how de Guyana cricket team run out of gas de other night when dem play Trinidad. Dem boys suspect that something was wrang when dem barely scrape home in de first game. Trinidad come out to play but Guyana stay in de pavilion.
But this is a country wid a lot of hope. Guyanese done know that dem gun beat Trinidad in de next match. De obeah man tell dem that. De same obeah man tell people how dem woulda get a five thousand dollar bill by de end of de year. De bill ain’t come out yet and de obeah man deh home sick. He name Roger de Lunch Man.
He did tell Ed Ah Mad that he coulda thief and he wouldn’t get ketch. He tell Sonny that he coulda do de same thing.
Talk half and wait pun de obeah man.