Dem boys seh...Bar Bee pocket de people money

Dem boys seh…Bar Bee pocket de people money

Jan 09, 2013 Dem Boys Seh, Features / Columnists, News

Guyana good for business but only fuh some people. There was a time when Guyana get a bad rating as a place to do business and Bharrat vow to change that. Dem boys seh that he do a good job because some businessmen would put dem head pun a block that dem business things dem can do in Guyana dem can’t do anywhere else.
Dem boys would like to tek people money to sell something and tek four years fuh deliver. That is good business and Bharrat put that system in place. He friend Bar Bee tek government money fuh buy drugs and don’t deliver.
But dem boys know that Bar Bee is a honest man and that he really buy de drugs, but is that de Ministry couldn’t use all suh he, Bar Bee, keep some and only release piece, piece.
But every year de Ministry of Health buying more drugs or at least paying out de money fuh de drugs. De Auditor General find nuff money short because de drugs don’t add up.
At de same time while Bar Bee either keeping de money fuh de Ministry because de Ministry don’t know fuh keep money, dem old age pensioners crying fuh a small piece suh that dem can live. When dem talk too hard, Ash Knee announce that de Ministry of Health banking wid New Gee Pee See.
No bank can’t keep that money because is money that got to be available at short notice. And because Bar Bee keeping de money and he keeping it good, nobody else can’t get de contract because dem don’t know fuh keep Government money.
But doing business is one thing, doing proper business is another. Dem boys going to listen to de questioning and hear wha excuse Bar Bee gun give. Dem gun have policemen nearby because dem boys certain that people gun go to jail.
Talk half and wait fuh de hoorah