Dem boys seh...Bar Bee didn’t enjoy Christmas

Dem boys seh…Bar Bee didn’t enjoy Christmas

Jan 08, 2013 Dem Boys Seh, Features / Columnists, News

Nuff people come home fuh de Christmas and all ah dem claim how is one of de best Christmas dem ever had. One man cook he pork and roast beef and pack dem in he suitcase and travel to Guyana. How dem dogs leh he pass is a mystery.
When dem boys ask he why he do that, he claim that de last time he come home he family tell he how pork and beef too dear so he had to mek do wid sheer veggie food.
But de truth is that de five per cent that De Donald pay out help fuh mek de Christmas good. Nobody didn’t raise dem price pun de goods and de rain didn’t fall heavy. Banks and DDL keep de likka cheap and then dem had de football.
Even de Bees had a good time. One of dem chase after a young girl whole night and when de girl decide that she ain’t able run no more and sit down wid de man he start fuh sleep at de table.
Brazzy end up talking but nobody didn’t hear, because he talk to a reporter who don’t have an avenue fuh write wha he hear. Bar Bee did plan to travel fuh de holidays, but when he hear that people getting pick up and carry to jail, he decide fuh stay home because he ent sure wha dem people singin’ up suh. Dem boys want to know how he gun go top side fuh that lawsuit he file.
And that is only de start. De parliament got some good question fuh he answer bout de money he get from Leslie fuh dem drugs. Dem boys already writing questions fuh de people ask he in parliament and he know. That is why he didn’t have a good Christmas. He spend most of de time using toilet paper.
Talk half and watch Bar Bee for 2013.