Dem boys seh...Bar Bee gun want start a funeral parlour

Dem boys seh…Bar Bee gun want start a funeral parlour

Jan 07, 2013 Dem Boys Seh, Features / Columnists, News

Jagdeo life in danger. That is wha de hard times newspaper seh de other day. Right away dem boys decide fuh check to see if he eat anything or if he following Chavez. Dem call some of he friends and dem call de hospital but nobody claim how dem didn’t know anything bout dat.
Dem call Brom Mell and ask he if he hear anything and he seh that if that was de case he would a know. Anyhow, he decide fuh call De Donald. Nobody ain’t know nutten bout that and is then dem realize that de hard times paper trying fuh mek news fuh sell.
Even Jagdeo seh that he didn’t know bout that because he don’t eat about and he don’t drink. He even seh that Old Year’s Night he been to Palm Court and he sit down wid all dem people and nobody ain’t even notice he.
Is a funny thing when people want to gain attention. De other day Bar Bee claim how people envy he and how dem want fuh stifle he business. Nobody didn’t know anything bout that because any business he got is something that everybody know about. Dem know bout de hospital business and de one he got wid de Ministry of Health.
Dem also know that he trying fuh sue people fuh get money but even that is a poor business. Just like de Easy Come Easy Go business that de Man wid de Hammer still crying about.
Dem boys want fuh know why Bar Bee and Jagdeo crying like a wolf looking fuh sympathy. Dem also want to know if de security expert is Steve who is dem boys friend. When Jagdeo tek way ads from de Big market paper, De Caires did cry too. De life of de paper was threatened but de paper still live,
Wha dem boys know is that everybody life in danger when dem go pun de road because is sheer madness happening. People don’t stop at traffic lights, don’t stop at major roads and when dem stop dem does stop suh sudden that anything can happen.
Wha dem boys suggest is that Bar Bee get into de funeral parlour business and de first corpse he gun get is de Hard time newspaper.
Talk half and pray fuh Bar Bee.