Dem boys seh...When de Bee couldn’t get a bribe, he sue

Dem boys seh…When de Bee couldn’t get a bribe, he sue

Jan 03, 2013 Dem Boys Seh, Features / Columnists, News

De year start and more news coming out about some people who help demselves like if dem was a cooperative. Dem is de same people who use to cuss Burnham when he talk about Guyanese helping demself although he didn’t mean it de way it happen among de Bees.
Dem boys talk bout de tekking till dem get blue and nutten change. Some people woulda shame wid all de criticisms but dem boys seh that de King Rat, and dem other Bees ain’t got no shame. In fact, de more dem boys talk is de more proud dem get.
Dem boys hear how one of de Bees demand a US$500,000 bribe from a man who come in and buy a big store. De man watch this Bee and tell he that money don’t fall from de sky and how he had to wuk hard fuh he own.
De Bee get vex and de next thing dem boys know is that he go to court. Is not de fuss time people try a bribe and when dem ain’t get dem go to court. Some of dem does call in de tax man fuh back dem up and that is why nuff businessman does rather drop a piece bribe,
Well this investor go to court and is there he find out that de Bee actually borrow $200 million pun de same store that he sell to de investor. But if he did only borrow was one thing. He want de investor to pay back de money that this Bee borrow.
Dem boys seh that he behave like a man who marry off he daughter and then telling she that she still got to go back to he house to wash, cook and clean. But that is how de Bees always operate.
In this New Year dem boys hope that dem change because bad luck gun surely follow dem.
Talk half and sell some shame to dem Bees.