Dem boys seh...Obeah Man and he wife fuh Donald

Dem boys seh…Obeah Man and he wife fuh Donald

Dec 04, 2012 Dem Boys Seh, Features / Columnists, News

Dem does got nuff competition and this time of de year dem got more competition that ever. GT&T use to got jingle competition. Digicel always got mingle competition. Ansa McAl. Banks DIH, and DDL got drinking competition while de government got blinking competition. Since you blink dem gone wid everything.
Now de British and dem Canadian and dem American tell dem boys that dem got a competition between de Guyana Government and de Chinee Government. This is de semifinal between dem two fuh de world title. De competition is fuh measure corruption.
Dem boys betting pun Guyana fuh win by a landslide. De Guyana is headed by none other than… we don’t have to call he name. De number two is de Barbie. All de Bees and Irfaat and Rob Earth deh in de team.
De final will be Christmas Eve and dem boys gun bring de result on Christmas Day.
And dem boys got a special prize fuh give dem fuh de New Year’s. Dem boys did plan fuh give dem nuff thing but is Christmas and dem boys ease off till in de New Year.
In de New Year dem boys done wid sledge hammer. Dem boys going to beg , borrow or steal a bulldozer fuh go after de Bees. Is more power dem coming wid, more power than a 320R hymac.
Dem boys gun root dem out. Dem don’t care if Donald don’t come on board because he and all gun get a rooting. He might even get a licking.
In fact, dem boys might carry he by some obeah man who got a serious obeah wife fuh deal wid he. Is licks till de blind, dumb and deaf spirit that tek over he body gun come out of he.
Dem boys believe that from he recent action that he don’t smell, he don’t taste and he don’t feel. Is nuff licks gun got to straighten he out.
Talk half and hope de obeah tek out de stupidness from Donald