Dem boys seh...Dem backlog really old

Dem boys seh…Dem backlog really old

Oct 31, 2012 Dem Boys Seh, Features / Columnists, News

De court now got three new judges and Uncle Donald seh is a good thing. He seh that dem gun help clear up de backlog. But wha he ain’t know is that every day more and more cases ending up in de same court.
Suh dem judge gun sit down and deal wid all dem case, starting wid de backlog. That is wha Uncle Donald seh. De only problem is that some of dem case deh suh long that de people who file dem either dead or gone away.
De other day de Chief Justice decide to deal wid some divorce case. One lady who file ten years ago didn’t got to go to court anymore because she husband dead five years before de divorce case call. De woman married and she was still waiting fuh de divorce and de court didn’t even know.
Another woman file in Guyana and then she go and file in de States. She get she divorce in de States eight years before de case call in Guyana. Now dem got more judges suh people expect that dem case gun call quick.
Dem boys seh that now dem gun try fuh file case bout all de thiefing that going round. Dem hope that dem judge ain’t gun tek orders because de habit is fuh mek dem case go to dem acting judge who got to tek instructions. This set ain’t acting.
Dem boys seh that dem have one big problem. De court don’t have seat fuh dem judge. All de courtroom full, suh even if this new set willing fuh wuk, dem got to find dem own court. Is same thing gun happen. Dem gun still got de backlog, because dem judge ain’t got place fuh wuk.
Talk half and watch dem backlog