Dem boys seh...Domestic violence really rampant

Dem boys seh…Domestic violence really rampant

Oct 22, 2012 Dem Boys Seh, Features / Columnists, News

People thiefing water and Irfaat seh that he gun jail who he ketch. Well dem boys seh that people thiefing everything and every day. A man decide to thief a thing wid another man. De problem he had was that he didn’t believe that de other man would hear.
He forget that people does talk and de man that talk was he friend. Jealous is a bad thing suh that start a story. De man who thief a thing dead.
He get stab in he neck. Suh when people talk bout domestic violence dem always talking bout how man kill woman. Dem got to talk bout man killing man.
Red Thread ain’t put out a statement yet and GHRA silent. Dem should talk because is domestic violence. Is strange how when man kill man dem don’t consider it domestic violence.
Dem also got domestic violence when people try fuh rob de government. That is domestic violence too because de money dem thief is fuh de home and even fuh some people who wukking as domestics.
Malaria is a domestic issue and de drug purchase issue is violence when one man can bid more than $200 million fuh some drugs that worth less than $30 million.
If people stop fuh think then dem would realize that people really conducting domestic violence against de whole country.
If this wasn’t a decent place dem boys woulda use de word fuh describe wha some people really doing to de country.
Dem boys would like to do de same thing to some of dem.
But every day bucket go ah well, one day de bottom gun fall out. This time de bottom only crack and that is because of de trap wha somebody set. Dem gun have another trap and more people gun get ketch.
Talk half and wait fuh de trap when it spring.