Dem boys seh...Leslie and Man Soor get ketch in public

Dem boys seh…Leslie and Man Soor get ketch in public

Oct 18, 2012 Dem Boys Seh, Features / Columnists, News

Old age can be a bad thing. Is when you can’t help youself, when you got to depend pun people. This old woman get she pension and she small piece from NIS. Out of that small piece she does give she daughter almost half fuh some food.
De other day she daughter give she a licking fuh she own pension money. And de daughter use a stick fuh beat de old lady who could only think about de days when she use to mind that same daughter and give she food and shelter. But dem boys seh that dem got a thing called retribution.
Some politicians got to watch that same retribution because some of dem spiteful. Some people set up a People’s Parliament. Dem ain’t trouble nobody. All dem do is sit down wid de placard and answer question when people ask.
Dem politicians put up a fence pun de spot. That didn’t stop de people because dem sit down outside de fence. Now de politicians give de people letter fuh move. De word is that is Gail do that because she got some position in de other parliament.
Dem boys waiting fuh see wha gun happen. Dem already see how dem politicians masturbating (in Guyana people does call it pumping) in public. Leslie and Man Soor guh pun TV wid de Jamaican who tun Guyanese. Dem was suppose to debate de opposition.
Uncle Donald already tell dem fuh bring in de media but because dem know that de opposition ignoring dem Leslie and Man Soor put two empty seat and talking to dem seat. Everybody know that chair can’t talk but is suh bassody dem two get that dem decide to try fuh a miracle.
Dem boys seh that Burnham voice shoulda come from dem chair. De two of dem woulda run out de TV station. Depending on who more strong, dem woulda stick up in de door. Leslie woulda get a heart attack and that woulda be retribution.
But as dem boys seh, time longer than twine.
Talk half and wait fuh de retribution.